|
Misceláneas
DÍA DAS LETRAS GALEGAS EN BUENOS AIRES
COA PRESENZA DO PRESIDENTE DE GALICIA
Importantes actos en Buenos Aires, para conmemorar o Día das Letras Galegas.
A xunta de Galicia resolveu facer a celebración institucional do día das letras
galegas en Buenos Aires, para elo, o preidente da Xunta trasladóuse á “Raíña do
Prata”, con unha comitiva que integraron destacadas personalidades da cultura
como: Isaac Díaz Pardo; Xesús Alonso Montero; Amancio Prada e o grupo Leilía.
Isaac, monumento vivente da nosa cultura, fíxonos rir e emocionar a todos, na
inauguración da mostra de traballos de Luis Seoane no Centro Cultural Borges.
Alonso Montero, deleitóunos coa súa marabillosa prosa; nunha conferencia sobre
Valle Inclán, dada no Centro Betanzos; na apertura da antedita exposición e, na
presentación no café Tortoni do libro, “Poemas en Lingua Galega” de Eduardo
Jorge Bosco (Buenos Aires, 1913-1943), con edición, prólogo e notas do propio
Alonso Montero. Neste acto, a intérprete arxentina, Graciela Pereira,
musicalizadora dos poemas de Bosco, cantou un par deles.
Amancio Prada foi o prato forte, na reapertura do Teatro Castelao do Centro
Gallego de Buenos Aires, no que, tamén, cantou tangos arxentinos o gran
intérprete Hugo Marcel, acompañado dunha moi boa parella de baile.
Este acto, no que recitaron senllos poemas de Xosé María Álvarez Blázquez , -o
homenaxeado deste ano-, un alumno e unha alumna do Colexio Santiago Apóstol, foi
pechado coa interpretación do Himno Galego polo coro do Centro Gallego de Buenos
Aires.
O grupo Leilía, actuóu o día dezasete, no Centro Galicia, despois dunha,
numerosa, banda de gaiteiros local. A calidade amplamente recoñecida destas
mulleres, evidenciouse, unha vez máis, diante de catro mil persoas que as
aplaudiron a rabiar. Neste acto pronunció magníficas palabras en galego o
presidente anfitrión, Héctor Fernández , e despois da lectura de poemas por
alumnas e alumnos do colexio Santiago Apóstol e da interpretación dunha canción
galega polo coro do mesmo instituto; o Himno Galego, interpretado conxuntamente
polos coros das sociedades de Residentes de Vigo e Arantei, Vilamarín A Peroxa,
foi digno broche para unhas celebracións do Día das Letras Galegas que non
esqueceremos.
Don Emilio Pérez Touriño, presidente da Xunta de Galicia, presidiu a
inauguración da mostra de Luis Seoane, a gala no teatro Castelao, unha homenaxe
aos escritores arxentinos, Jorge Luis Borges, Julio Cortazar e Ernesto Sábato,
así como a presentación no café Tortoni.
Tivo un curto encontro cos presidentes das entidades galegas antes de participar
no multitudinario acto do día dezasete e, fora recibido na casa de goberno por
Julio Cobos, vicepresidente da Argentina, -en exercicio da presidencia por
ausencia de Cristina Fernández-, a quen lle manifestou o desexo de que se atopen
na Cidade da Cultura, en Santiago de Compostela no 2010, -ano do bicentenario da
Argentina- a presidenta Fernández e o presidente Rodríguez Zapatero.
Algunhas expresións do mandatario galego nos dous días de actos en Buenos Aires:
No Centro Cultural Borges dixo de Seoane:“home incansable que enguliu con
fruición as últimas tendencias artísticas” e que demostrou que “a conquista da
condición universal só é posible cando se bebe nos mananciais da cultura propia,
específica de cadaquén, e se mantén unha insubornable lealdade ás raíces”.
O presidente referíuse ao artista coma “o símbolo dunha Galicia cos poros
abertos a todos os eventos e acentos culturais do mundo. Unha Galicia, en
definitiva, con vocación universal”.
Na reapertura do Teatro Castelao dixo: “ É un fermoso tributo á memoria do autor
de “Sempre en Galiza” que un teatro galego, situado no corazón mesmo do seu
amado Buenos Aires, inscriba no seu frontispicio o nome daquel sinxelo home
nacido en Rianxo, médico non exercente, artista escritor e político que logrou
coas súas caricaturas, cos seus debuxos, cos seus escritos e coa testemuña da
súa vida exemplar, expresar como só Rosalía o fixera antes que el, as arelas e
os devezos máis fondos do pobo galego”.
“houbo quen comentou, inocentemente, que a Xunta e o seu Presidente íamos
celebrar esta ano o Día das Letras Galegas por primeira vez fóra de Galicia.
Pero equivocouse, non é certo”.
“estamos a celebrar o Día das Letras Galegas en Buenos Aires, si, pero tamén en
Galicia: Porque no Teatro Castelao de Buenos Aires, estamos en Galicia, porque
vós sodes Galicia e porque estando coa colectividade galega en Arxentina estamos
sempre en Galicia”.
“neste Día das Letras Galegas que celebro por primeira vez con vós, cos galegos
da Arxentina, quero extender esta homenaxe a Xosé María Álvarez Blázquez aos
escritores galegos que, desdes esta cidade de Buenos Aires e en íntima e
estreita relación coa colectividade galega, continuaron escribindo en lingua
galega, enriquecendo o noso patrimonio literario e fornecéndonos de obras que
hoxe se estudan en todos os colexios de Galicia”.
“Estoume referindo por suposto, ao xa citado Castelao, pero tamén a Luis Seoane,
a Rafael Dieste, a Eduardo Blanco Amor, a Lorenzo Varela, todas elas figuras que
xa recibiron no seu momento a homenaxe do Día das Letras Galegas”.
De Eduardo Jorge Bosco, dixo no Café Tortoni: é exemplo dos moitos grandes
poetas que escribiron e escriben sobre Galicia ou en galego sen ser “procedentes
da estirpe de Breogán”. O titular da Xunta citou, ademais do caso de Eduardo
Jorge Bosco, os poemas en galego doutros autores como Federico García Lorca ou o
catalán Carles Riba que escribiu, con 17 anos, uns poemas en galego que resultan
“conmovedores para calquera lector”.
“O amor entre escritores e os fillos de Breogán non faltou tampouco na Arxentina”,
“un país no que as circunstancias eran especialmente propicias dado o gran
número de persoas galegas residentes nel”. “Relevantes foron as parellas
formadas por Julio Cortázar e Aurora Bernárdez e Ernesto Sábato con Elvira
González Fraga”. “Estas relacións constituíron un poderoso imán que achegou a
ambos os dous escritores a Galicia, converténdoos en amigos e entrañables
propagandistas da nosa terra”.
Do último acto institucional no Centro Galicia saliento as seguintes frases do
presidente galego:
“Sen os galegos da Argentina a cultura galega tería perecido; sen a Galicia de
aquén do mar moitas das aventuras intelectuais da Galicia contemporánea non
serían posibles”. “Nesta terra de acollida estiveron os nosos emigrantes e tamén
os nosos emigrados”, “cando en Galicia non se podía editar en galego, editábase
en Argentina” ,“cando Galicia semellaba separarse do mundo, do renacer da vella
Europa durante unha longa noite de pedra, os nosos artistas bebían de todas as
vangardas creativas e eles mesmo constituíronse en vangarda que anovou a arte
galega da posguerra civil”.
“vitais para Galicia os 20 anos que foron de 1940 a 1960”. “Nesta época, unha
“longa ringleira de ilustres patrianos fixeron posible o renacemento cultural de
Galicia cando todas as causas semellaban mortas”. “Porque sen o esforzo creador
dos galegos do exterior nesta época non haberíamos tido futuro”.
Pulsar en cada fotografía para verla ampliada
©
www.galiciaconvos.com.ar
|
